Vergnoigt wiehert de Amtsschimmel
In de Karkenböker vun Allermoi kann man nohlesen, datt de Hüüs hier an’n Diek in oole Tieden keene Huusnummern harrn.
De Lüüd wohnten entweder „oberwärts“ orrer „niederwärts“ vun de Kark. Ok in Hamborg kreegen de Hüüs erst noh den grooten Hamborger Brand von 1842 Nummern. Dat güll ok för de Marschlann’n. Man tellte in Moorfleet, as in Allermoi de Hüüs an’n Diek eenfach de Reeg noh dörch und jedereen kreeg so siene Nummer. Mien Öllernhuus harr vun dor an de Nummer 64. Dat güng meist hunnert Joahr good, bit noh den 2. Weltkrieg. Dornoh schull denn je allns beeter warden. Ick weet nich genau, wannehr de Amtsschimmel sick dat afkneepen hett. Op de Meldebestätigung vun’t Amt vun’n 10 August 1949 steiht jedenfalls dat ick bi miene Öllern an’n Billwarder Elwdiek Nr 655 wohn. Wie kunn dat angohn?
Öberall in Hamborg hebbt de Hüüs op den rechte Strootensiet Nummern mit grode Tallen und op de linke Siet mit krumme. Dat schull hier an’n Diek nu ok gelln, d.h. butendieks de groden und binnendieks de krummen Nummern.
Öberall mang twee Hüüs, wo noch Platz genog för een nee’s Huus is, hett man – plietsch as man is – eene Nummer utlooten. Dummerwies wull eener vun de Amtsschimmel weeten, weshalb de Allermoier an’n Billwarder Elwdiek wohnt? As man em verklookfiedelt harr, datt de Billwarder Landschaft bit an de Dove Elw reckt und de Diek doch ok de Billwarder Buurn tohört, dor meent he nohdenkernd: „Dat gellt denn doch ok för den Moorfleeter Diek.“ Dat seegen ok de annern Schimmels in und setten forts noch eenen bobenop:
ok den Slüsendamm und den Kurfürstendiek mokten se to ’n Billwarder Elwdiek.
De füng nu in Deepstack an und reckte bit noh Curslook. Dat letzte Huus an den nee’n Billwarder Elwdiek wör just de Stall vun de Amtsschimmel, nämlich dat Ortsamt Veer- und Marsch-lann’n und glänzte mit de Huusnummer 1094.
Wi harrn hier nu mit 15 km de längste Stroot vun Hamborg. Öber de Jung-Hanseaten vun de Elwchaussee mit jem eehre mickerigen 10 km kunn man blots wiehern.
As ick 1959/60 mien Huus in Allermoi boote, kreeg ick de Nummer 653. In’n Harwst 59 schull een Inspekter vun de Boosporkass nohkieken, ob ick jem eehr Geld ok verboot und nicht versoopen heff. De Döösbaddel is doch wahrafftig in Deepstack ut den Vörtortzug steegen und tofoot den Billwarder Elwdiek langtüffelt bit achter de Allermoier Kark. Dat is just so’n Enn’n, as de Elwchaussee lang is, nämlich vun Altona bit noh Blanknees. As he denn wieswör, datt he noch eenmol 4 km noh’n Middel Landweg pedden schull, füng he meist an to blarrn. De Muurlüüd erbarmten sick obers und bröchten em mit jem eehren LKW noh’n Bohnhoff. Langen hett de Spijök mit den längsten Diek vun Hamborg allerdings nicht duurt. In’n Fröhjoahr 1961 kreeg Moorfleet sienen Moorfleeter Diek, de bit an den Middel Landweg reckte und Allermoi sienen Allermoier Diek. Siet de Tied heff ick de Nummer 123. Ok den Slüüsendamm und den Kurfürstendiek hebbt wi wedder.
Leider wohnt de Eekboom-Allermoier nu an’n Moorfleeter Diek. Noch wat: Leider weet bald keeneen mehr, dat de Billwarder Landschaft bit an de Dove Elw reckt und datt Bergedorf West eegentlich Billwarder – Ost heeten müsst.
Herbert Witt
